Plot 33 vjet
Tuj shkel nji tokë tjetër
Por jo sa ajo që unë e lash’ t’vjetër
Kurrë nuk kam mallku e as nuk kam nemë
E kurrë urrejtë s’kam askend
Por tanë lot që kam derdh
I kam mbledh n’nji vend
Sa herë si nji grusht jam mbledh me hy me u la
Me lot e mia kam pastru mallin askush pa m’i pa!
Sa herë kam mendu sa zor asht me qenë gru shqiptare
Sa kam lakmu njiherë me u ba tapë e me thy gastare
E mos me mujtë e mos me ta bajtë
Veç njiherë shishen e rakisë n’dorë me majtë
Rrugës me ec pa qëllim e me tret
At zog që shkonte n’hava
Me përshëndet
Kangës vijnë vaporat moj nane me t’ja kris
Hiç kush pa m’pa tana fotot me i gris !
Ah veç njiherë sa kam dashtë!
As cigare nuk kam djeg bile me m’djeg mërzinë
Sa herë që kam pa lot e Samisë
E dy djelmtë e mi t’strukun
Tuj hesht e tuj përbi vetminë!
Na hiç pa i mshef ata ndjenja
Kur n’Sarajevë pat ra rrfeja
Ata atje tuj ik e tuj u rujtë pushkës
E na tuj nej si n’ferra
Si kur shkel s’pari pragun e krushkës!
Hiç pa u rahatu
E asgja tuj mos lakmu!
33 vjet
Si nji natë e gjatë pa gjum
Si 33 shekuj që u dogjën e u ban shkrum!
As atje
As k’tu
Ditë tuj shty
Vitet tuj numru
Friga n’palcë tuj m’hy e ethet n’asht
Londrën që kam nisë me dashtë!
Se 33 vite nuk jan pak
Ose kthehesh me kohë ose çel konak!
Unë si brez I parë
Me këtë vend tanë jetën kam ba pazar
Brezi i dytë nisë e i m’yll sytë
E brezi i tretë që lindin n’vend t’huj
Nuk don ma me ia ditë!
Sot 33 vjet
Prej Shkupit drejtë n’Heathrow azil
Sa fjalë e turpshme m’asht duk sa fjalë rezil!
Eeej aziiiil
Sa fjalë e randë m’asht duk
E lypsar i shtetit sa m’asht duk turp!
E sot
Sot taman gjysa jetës
33 vjet atje e 33 k’tu
Andrrat m’janë fik e jam dorzu!
33 vjet
Nuk janë pak!