Pse të kanë lidhë ,ty moj bukuroshe
Merhamet nuk paska ,aspak kjo dyrnja,
Je si gjaku e kuqe,më je kuqaloshe
Nuk din bota mjerë ,me jetu n’sefa .
Gjithë shoqet e tua ,në majat e larta
Ti e strukun më rri ,thellë në mendime
Dashnit e tua ,janë shumë ma të zjarrta
S’mashtrohesh lehtë , s’jeton me premtime !
Me zemër të pastër dhe kokën e ulun
E mbyllun n’kafaz e ruan dashninë,
Për bilbilin laraman ,me zemër të këputun
Jep jetën tande ,jep gjithë pasuninë .
Majat e nalta ,kurrë nuk i lakmon
N’pazar nuk shitesh ,për dy fije pare
Mbyllesh moj gonxhe ,dhe sa shumë duron
Për fjalët e botës ,që nuk vlejnë hiç fare.
Çilu moj gonxhe ,ti me gonxhet tjera
Bota e sinqertë ,nuk ka qenë kurrë
Mos i len t’mërziten ,ato zemra t’mjera
Hape zemrën tande, mos u shëndrro në gur !
