Nji shegë devedishe me sy e kam grabitë
Zemrat e kuqe si gjaku sa shumë më kanë mahnitë
Me milion zemra t’vogla të mbylluna mbrenda saj
Si prushi i mangalles kuqërrimtë sa më mbushën vaj!
Kokërr me kokërr ,ç’e kam la me lot
Kur shtrijshim safabrezin ,dhe qërojshim plot.
Më kujtoj tabakun ,e vjeshtave ulqinake
Molla japane, mandarina, kimça ,plot gështenja dimnake.
Çdo kokërr aty mbrenda ,e mbyllun në at arkë
E kuqrremtë si hana kur rrëxohet mbi barkë,
Si margaritar i kuq mes shegës devedishe
Lehtë lundron mbi det ,me ngjyrat si fildishe !
Moj shegë e Ulqinit ,e egër dhe e butë
Me kokrra kur të mbushesh nuk e la pa të këputë,
I mbyll ato kokrra si suret e Kuranit, Çeli kuqaloshet e amla si dhuratat e Bajramit.
Degën tande filiz ,në Chelsea sonte e mbolla
Erën e oborrit t’vajznisë,deri këtu e solla!
Kangën ty ta qita ,ngadalë po e këndoj
Në rininë time më ktheve , aty ku ende jetoj!
Ti shegë devedishe ,me zemër kuq si gjak
Mbyllu me kujtimet e mia , t’shkuarës i ven kapak.
Në Gjerana të kthehem shegat që kam lanë
Asgja ma njësoj ,nuk mbeti në at anë ,
Nji mik më tha nji ditë ,mos gabo me shku
Ma mirë si i ke lanë ,ashtu edhe me i kujtu !
Të besoj o mik dhe ma mirë mos të kthehem
Avash avash edhe unë nga kujtimet dehem
Atë Parajsa që lashë ashtu t’a mbaj mend
Me shegën devedishe,në ma t’bukurin vend!