Ne të gjithë ishim të burgosur deri sa ti ishe i lirë me pranga në duar.
Ne silleshim të lumtur rrugëve Beogradit dhe Jugosllavisë me emrin “shiftar “ deri sa ti e dije emrin e vërtetë.
Ne ishim të lirë me gojë të burgosur ,deri sa ti ishe i burgosur me fjalën e lirë !
Ne të gjithë ishim pranë nanës , babës , burrit, gruas derisa Xhemalija me dy fëmijët të priste në shtëpinë e vogël në mahallën e Kacallarve me zemrën bujare dhe shpirtin e këputur . E takova vet Xhemalijen dhe nga dora sajë kam pi kafen me shijen më të hidhur por kurrë një kafe më të mirë në jetë!
Ne të gjithë thanim llafe dhe muhabete të kota në dhomat e nxehta dhe luga e çajit nuk ndalej me crrrng crrrng duke e përzirë deri sa ti me çdo fjalë ia shpojshe zemrën atyre në mes të Beogradit !
Ti nuk ishe trim baco jo ! Ne ishim trima që zgërdhinim dhëmbët me ta çdo ditë me perde syve . Na ishim trima që rrehnim shuplakë Sërbisë, Amerikës , Turkut Kazistanit e Pakistanit e dreqit mallkuar se ishin çlirimtarët tonë. Ti baco nuk kishe kohë as shuplakë me rreh sepse duart i kishe me zinxhir !
Ti baco edhe budallë ishe , ashtu të thonin disa, sepse ne të mençurit kurrë nuk e kuptuam sa na duan të tjerët ndërsa ti e dijshe dhe e dite gjithmonë . Dora e majtë mos pastë nevojë për dorën e djathë , ashtu thojmë, e ti e dite o bacë !
Po Enverist a ishe ? E doje Shqipërinë si gjithë ne që e donim apo e doje Enverin ?Ne s’na thoshte kush Enverist bile as na përfilshin sepse nuk ishim në burg. Ata i frigoheshin vetëm atyre që janë në burg! Për të tjerët nuk ia kishin gajlen!
Ku ta din njeriu sepse ti ç’farë nuk ishe për veç jo atdhetar i përbetuar ?
Ishe cinik, kokëfortë, sepse ne të gjithë bindeshim secilës politikë që na vinte ka dera , e ti baco dojshe me i mësu ata që ne kemi ardhë në këto troje para të gjithëve ! Hej kuku po kokën e fortë e pate ! Ku i tregohet historija të paditurve dhe injorantave ?
Jo jo baco kokën çelik e kishe ! As muri burgut, as prangat nuk të zbutën .
Edhe spijun ishe sepse ashtu thonë . Nës del i gjallë nga burgu i tyre je spijun dhe s’ka tjetër !
Ne ishim ata që treguam se të jesh “shiptar “ , pro-Sërb,pro American apo pro Turk është zgjidhje e vetme për një liri të kombit!
Baco ty të qoftë dheu i lehtë se jo veç Kosova por gjithë shqiptarët ta kanë borxh !
Ende sot po sillemi rrugëve të botës, disa po shesin copat e Kosovës, disa me qëllim po shkatrrojnë Ulqinin , disa po ngulfatin zërin e Preshevës e Shkupit , e disa atje nga Shqipërija e largët që dalë ngadalë po na shëndrrohet në një lindje ku dielli del në Perendim deri sa ti baco at vakt e dite se veç të zgjohesh nga gjumi është e vetmja liri!
Të lirë kemi me qenë vetëm atëherë kur e dojmë vehten dhe të tjerët jo si shpëtimtar por si miq të vërtetë!
Dora e majtë mos pastë nevojë për të djathtën . E ti baco nuk i kurseve as dorën e majtë as dorën e djathë që t’i lidhën në pranga me dekada sepse pa liri fjale dhe pa dinjitet kombi nuk të nevojitet as dora e majtë as e djathta.
Se deshe vetvehten s’të don as vet Perendija !
Nuk të them Mandela i Kosovës sepse për mua je i madhi Baca Adem i Kosovës.
Të qoftë i lehtë dheu i tokës që shumë e deshte dhe e nderove!