Fluturoj e lumtun ,mbi qiellin dhe detin
Gjuetari m’shkrep plumin pa nji pikë mëshirë
Bie për tokë ,dhe vdes me hall të shkretin
T’vdes për qef t’gjuetarit sa asht e vështirë.
Fllanza, fazani , shkurtëza pupulaqe,
Sa e zbukurojmë qiellin si gurë margaritar ,
Pelikani lazdran , pëllumbi me pika në faqe
Lindim për gjuetarin ,jetën me na e marrë!
Petën dhe orizin ,sa shumë e hijeshojmë
Jetën na e marrin ,për shije të gojës
N’trathëti na vrasin ,lart kur fluturojmë ,
Dëshmore shpesh bijmë ,si legjendaret e Trojës !
Gjyna pak s’ju vjen ,o ju gjuetar ,
Për pikën e qefit t’na rrëzoni nga qielli
Të vrisni nji shpirt pa faj ,ju baheni mëkatar
A vritet krijesa mbi qiell,a shuhet nji rreze dielli ?
Albatrosi, gugashi gjeraçina e bukur
Mëllenja , kanarina dhe zogjët shtegëtar
Zbukurojmë qiellin , botën e bëjmë të lumtur
Dhe unë turtullesha gjorë ,që jetën ma kanë marrë!
Ndalu o gjuetar ,o ti trimi i pushkës ,
Vare at pushkë në mur,fishekun gjuaje në kashtë
Fllanzën e malit fisnike dhe asaj të fushës
Mos ja ndalni kangën ,por këndoni bashkë!
Kangën e Tahirit ,me merak e këndoni
Si kangën ma t’bukur ,për at gjuetarin
Zagart edhe gjonjën ,kurrë mos i harroni
Sa herë me thëllëzën ,kangës ia marrin !
Fisheku nuk shkrep ,u deh nga hyjnija
Fëllanzës mahnitëse me gjithë shpezët tjerë
Nga gjoja gjuetari ,durëthatê u kthy ke shpija
Turtullesha e ti fisnike ,ia çeli me gaz at derë.
O mori pushkë o pushkë ,ti moj grykë florinit ,
Mos u shkrep pa vend ,aty ku hiç nuk duhet
Mos na i prek margaritaret ato zogjët e Ulqinit!
Ruaje o trim fishekun ,për atdheun fisheku ruhet .
Ti moj pushkë që shkrep ,ti moj grykë e vjetër ,
Leni zogjët mbi qiell le të fluturojnë
Mos lejoni të na ikin ,në nji botë tjetër
Janë engjujt e qiellit ,Ulqinin e zbukurojnë !
Turtullesha ime,pushkën po e vari ,
Unë gjuetari vjetër ,kurrë ma nuk të vras,
Fluturo lartë ,dhe ma sjell nji gjeth lari
Eja më hyp në krah ,sa herë që të thëras !
Kangën e Tahirit ,eja ta këndojmë bashkë
Deri në Çamëri dhe gjithë trojet shqiptare
Eja turtulleshë ,se me shpirt të kam dashtë
Pushka asht për trimin ,atdheu kur s’ka çajre !
Shqiponja ju prinë ,të gjithë tokave tona
Qiell ma krenar ,nuk ka askund në botë,
Deri n’Kalabri larg le të shkon jehona
Me mua Tahirin,këngën ta qajmë me lot !