E mbajshin në zemër si ma t’bukurin kujtim
Ulqin e Shkodër si një vëlla dhe motër
Në gjuhë dhe adete shumë pak kanë dallim
Shumë veta janë rritë në të njëjtën votër.
Një ditë ia morrën të gjitha kujtimet
Një tel me gjemba i ndau pa mëshire
Por zemrës kush mund t’ia ndalë udhëtimet
Udhëton nuk ndalet edhe kur e ka vështirë.
Sa të bukura ishin dikur ato tregime
Nanat e babat që na i tregonin
Në Shkodrën e bukur në këmbë udhëtimet
Por edhe me kalë sa herë që shkonin.
Ajo kohë e bukur kohë e florinit
Çdo gja me pakicë ,por plot dashuri
Na ruaj Zot nga kjo epokë e mallkimit
Se ç’farë po na ndodhë askush nuk e di.
Pesh na ka çu e mira dhe lakmija
Nuk ka pasuri që syrin na e ngop
Kah po na ik e gjithë lumturija
Veç një zemër e pastër është një zemër plot .